崩壞(二)

佢比左鎖匙我一個人上去佢屋企先 我一訓上細佬張床就忍唔住
眼淚一滴滴享眼角流落黎 個頭痛到就快裂開 我想訓一訓但不停咁流眼淚訓唔到
我唯有對住面牆忍耐 眼淚快d流完吧 快d平靜落黎 唔好喊呀
但係眼淚唔聽話 一直一直流 快d流完 我返屋企 唔想講啦 返去啦 以後都唔好再黎
仲係停唔到 結果媽媽返左黎 佢入黎問我點樣 我想開口講野
一開口卻只能夠喊 嗚嗚嗚 不停咁喊 喊到講唔到野
「媽媽係度，唔駛驚，冇事既，唔好喊，乖，唔好喊」

「我好驚我好驚好驚好驚呀!我唔想食藥，我都唔想食架，我唔想有病
但係唔食唔得呀!我好驚我會痴線，我再唔食真係會痴線架，我好驚呀好驚喔
d意志力享個腦度黎，我個腦有事，淨係靠意志力控制唔到
我唔係淨係唔開心呀，我全身都係病，我精神受唔住既壓力享身體入面周圍走
我呢度唔舒服果度唔舒服，一陣出紅疹一陣發燒一陣又頭痛胃痛心臟痛
我唔舒服又會唔開心，唔開心又會亂諗野，我好辛苦好攰，唔係我想死架
我唔想死架，但係有時我好想死我好想掉低晒你地，我咩都唔想要
我唔想負責任，唔係我要出世，我唔知道我以後要點樣過日子
我好努力架啦我真係好努力咁過正常的生活，我不斷咁製造d動力比自己
我唔敢停低我好怕一停低我唔會想再起返身，我唔知自己做緊乜野，我好驚呀呀呀...」

媽媽攬住我，掃我的背脊「你唔會咁易死架，你以後會同人結婚，仲會有個仔
你死左爸爸媽媽點樣呢?你唔開心搵細佬傾下偈，你有事媽媽都會心痛架
媽咪知你乖 你唔好逼得自己咁緊...陰公咯 腫成咁...」
我唔想兩個細佬知道佢地家姐的真面目，我好冇用，唔想佢地有個咁的家姐
我唔想佢地知道我會喊，唔想佢地睇到我咁脆弱
「我唔可以咁樣就唔返工，我要返工，我要過正常的生活，我想做有用的人」